Qimmatli buyum va hujjatlarni bankda xavfsiz saqlash mumkinmi?

Bank yacheykasi nima o’zi? Qimmat buyumlarni saqlash uchun qanday shartlarda yacheykani ijaraga olish mumkin va uning narxi qancha?

Bank yacheykasi nima?

Bank yacheykalari oddiy metall seyflar bo'lib, bank ularni o'z mijozlariga ijaraga taklif etadi. Yacheykaning o'lchami mijozning ehtiyojlariga bog'liq, ular bir nechta xil o’lchamda bo’ladi. Yacheykalar bankning maxsus ajratilgan joyida - depozitariylarda joylahtiriladi, depozitariylar odatda binolarning podval qismida joylashadi, bir nechta zirhli eshikka ega bo’ladi va ishonchli signalizatsiya tizimi bilan himoyalanadi.

Bank yacheykalarida naqd pul, qimmatli qog'ozlar, qimmatbaho metallar va toshlar, zargarlik buyumlari, hujjatlar va boshqa qimmatbaho narsalarni saqlash mumkin.

Bank yacheykasi ham ishonchli ham maxfiydir, shuning uchun yacheyka kalitlari faqat seyf ijarachisi va bank vakilida saqlanadi, uchinchi shaxslarning ushbu xonaga kirishi cheklangan bo’ladi.

Mijozlar o'z yacheykalariga kirishi bo’yicha hech qanday cheklov yo’q. Ammo har bir tashrifda mijoz o'z shaxsini tasdiqlovchi hujjatni taqdim etishi va maxsus jurnalga imzo qo'yishi shart.

Odatda, yacheykani ochish uchun ikkita kalit kerak bo'ladi - bank xodimining kaliti (begona odam kiritilmaydi), shuningdek mijoz kaliti. Xodim o'z kaliti bilan, mijoz o’z kaliti bilan yacheykani ochadi va bank xodimi mijozni qimmatbaho buyumlari bilan yolg'iz qoldiradi. Ya'ni, siz shunchaki depozitariyga kirib, yacheykangizni ocholmaysiz, bank xodimi kirishi shart.

Depozit yacheykalaridan foydalanishda banklar mijozlarga quyidagi imkoniyatlarni taqdim etadi:

• Mijoz yacheykalardan qulay bo'lgan istalgan vaqtda bankning ish kunlari va soatlarida foydalanishi mumkin;
• Zarur bo'lganda, bank mijozni yacheyka tarkibini qayta hisoblash va haqiqiyligini tekshirish uchun asbob-uskunalar bilan ta'minlashi mumkin;
• Ijara muddatini va yacheyka hajmini tanlash imkoniyati, narxlari ham shunga bog'liq bo’ladi;
• Maxfiylik saqlanishi;
• Zamonaviy xavfsizlik tizimi, shu jumladan yong'in xavfsizligi;
• Zamonaviy bank uskunalari;
• Yacheyka bank xodimi bilan birga ochiladi. Buning uchun u elektron va mexanik kalitdan foydalanadi. Uning nusxalaridan biri mijozda saqlanadi;
• Doimiy mijozlar uchun chegirmalar yoki ma’lum xizmatlardan bepul foydalanish imkoniyati.

Yacheyka qanday shartlarda taqdim etiladi?

Har kim qimmatbaho narsalarni saqlash uchun yacheykadan foydalanishi mumkin, buning uchun faqat pasport kerak bo’ladi. Yacheykani ijaraga olish bank bilan ijara shartnomasi tuzilgandan keyin mumkin bo'ladi. Shartnomaga ko'ra, bank yacheyka tarkibi haqida ma'lumotga ega bo’lmaydi, faqat ijaraga berish bo'yicha xizmat ko'rsatadi. Ya'ni, bank yacheykaning yaxlitligi uchun javobgardir.

Shu bilan birga, yacheykalarda boshqalarga zarar yetkazishi mumkin bo‘lgan har qanday turdagi giyohvandlik vositalari yoki radioaktiv moddalarni saqlash taqiqlanadi. Shuningdek, qonun hujjatlariga muvofiq o‘qotar qurol yoki boshqa qurolni saqlash taqiqlanadi. Yacheykada saqlanayotgan narsalarning o'zaro ta'siridan kelib chiqadigan har qanday yo'qotishlar uchun mijozning o'zi javobgar bo'lishi alohida belgilab qo'yilgan.

Bank uchun eng asosiysi bu mijoz yacheykada taqiqlangan narsalarni saqlamasligi (masalan, uskunani ishdan chiqarishi mumkin bo’lgan narsalar) va ijara xizmati uchun o'z vaqtida to'lov qilishidir.

Bank yacheykasini ijaraga olish narxi qancha?

Banklar uchun depozit yacheykalari narxining yagona tarifi yo'q. Har bir bank ichki siyosati asosida narxni belgilaydi. Shuningdek, yacheyka ijarasi narxi uning o'lchamiga bog'liq - balandligi 40 mm dan 650 mm gacha bo'lgan yacheykalar mavjud. Ichki hajmi qanchalik katta bo'lsa, narxi shuncha qimmatroq bo’ladi.

Bugungi kunda quyidagi banklarda yacheykani ijaraga olish mumkin:

• Orient Finans bank: yacheyka o‘lchami 74 mm dan 600 mm gacha, narxi oyiga 15 000 so‘mdan 70 000 so‘mgacha.
• Ipak yo'li bank: yacheyka o'lchami 50 mm dan 300 mm gacha, narxi oyiga 18 000 so'mdan 42 000 so'mgacha.
• Asia Alliance bank: yacheyka o'lchami 75 mm dan 600 mm gacha, narxi oyiga 45 000 so'mdan 150 000 so'mgacha.
• O‘zsanoatqurilishbank: yacheyka o‘lchami 40 mm dan 260 mm gacha, narxi oyiga 11 150 so‘mdan 44 600 so‘mgacha.
• NBU: yacheyka oʻlchami 50 mm dan 500 mm gacha, narxi oyiga 60 000 soʻmdan 150 000 soʻmgacha.
• Invest Finans bank: yacheyka o'lchami 70 mm dan 256 mm gacha, narxi oyiga 30 000 so'mdan 50 000 so'mgacha.
• Kapitalbank: yacheyka o‘lchami 74 mm dan 650 mm gacha, narxi oyiga 15 000 so‘mdan 100 000 so‘mgacha.
• Hamkorbank: yacheyka o'lchami 74 mm dan 256 mm gacha, narxi oyiga 30 000 so'mdan 50 000 so'mgacha.
• Trastbank: yacheyka oʻlchami 140 mm dan 390 mm gacha, narxi oyiga 10 000 soʻmdan 20 000 soʻmgacha.
• Asakabank: yacheyka oʻlchami 40 mm dan 178 mm gacha, narxi oyiga 100 000 soʻm.

Bank yacheykalari yuqoridagi banklarning barcha filiallarida mavjud emas. Bankning aloqa markazi yoki sayti orqali yacheykalar mavjudligi to'g'risidagi ma'lumotlarni bankka murojaat qilishdan oldin aniqlashtirish zarur.